【第一次喺香港Staycation：用遊客角度欣賞維港夜景！】
終於到我去Staycation！疫情之下大家都流行去Staycation，但坦白講小弟真係未試過，之前都唔係太大興趣，最近終於第一次走咗去，旅行嘅感覺都返曬嚟！
以為好多嘢係必然，冇諗過原來住間酒店攤抖下都咁難，以前一年最少兩次是基本吧。如今可能望住嘅，唔係加勒比海，唔係峇里resort，唔係悉尼夜景，唔係杭州園林，但呢個景都治癒到一下嘅。
今次入住嘅係 Marco Polo Hongkong Hotel，住喺維港旁邊，仲可以升級做海景房，成個維港景色盡收眼底，感覺何其壯觀。熄曬房燈影夜景，係旅行先會做嘅事，諗返以前做旅遊記者，住呢啲房型，點都喺夜景熄燈前，仆返去影夜景。睇返紀錄，原來我十個月冇開過部相機，竟然一下子唔記得點用。一如好多朋友，喺香港咁強壓迫同無力感入面，你唔會想拎部相機出嚟影一張相，而作為鍾意影相嘅人，我呢十個月又真係做得到。
第一次咁角度睇香港夜景，睇住由五光十色到熄燈，喺紐約、喺北京、喺上海、喺悉尼，喺好多地方我都會咁做，但喺香港，原來未試過；數住天星小輪幾耐一班，然後影「船軌」，斷估你唔會咁有神心喺海旁等一晚,等到佢熄燈影兩個景，但都幾過癮——然後發現天星小輪真係行得好慢。
當然，去旅行我或者要取捨影夜景定行夜市，家陣唔通落街行海港城咩，望住個海放空下，又係Staycation另一種體驗。我講唔出我真係好愛香港，睇到個咁靚夜景，唔想佢變差之類廢話，我感性不來，純粹呢一晚忘記香港人身份，用遊客角度睇維港日夜兩景，原來咁靚。
事前有一刻覺得「Staycation」好似好無聊，但講真呢大半年嚟，我諗大家都累喇，又冇得出去外遊，搵唔到個地方出走，不如去酒店攤抖，搵個地方放空、清理自己煩悶嘅思緒，效果可能冇去一轉旅行咁強烈，但都係好寫意嘅一晚。
另外，Staycation唔單止住，都要大飽口福，Marco Polo間餐廳Cucina榮獲2020 Forbes Travel四星，現時撞正係白松露嘅時令季節，有唔少菜式用佢做賣點。最深刻係頭盤「日本 Taiyouran 炒蛋伴多士、香煎北海道帶子及白松露」，極香濃白松露配特大帶子同滑蛋，入口即溶，松露同炒蛋勁夾，啖啖甘香，簡直齒頰留香，唔捨得吞落肚、驚為天人嘅美味之作；仲有「西西里紅蝦扁意大利麵伴車厘茄」，蝦湯湯底濃郁，同清甜意大利車厘茄係完美配搭，開胃而惹味，再配個咁嘅無敵海景，盡得視覺同味覺嘅甜頭！
作為一個鍾意睇戲兼旅行嘅人，Marco Polo呢個體驗唔單止俾你重拾返旅行影夜景感覺，同時都有得睇戲，事關呢次Marco Polo推出咗「逍遙電影夢」Package，由即日起至12月31日，但凡以呢個計劃入住，唔止可以免費升級去海景客房、包咗Cucina迎賓飲品、自助早餐外，仲送兩張海運戲院戲飛，兼且有嘉禾院線會員GH Moviegoer一年會藉，每晚都只係$999起！有咁正嘅景觀，計落絕對係抵嘅，詳情可以睇：https://bit.ly/36uukLy
更多電影文章請睇：
晞。觀影記事
特別鳴謝：馬可孛羅香港酒店
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
Search